Menningarlegar hugrenningar ... hvað annað

Ekki það að ég sé eitthvað ánægður með að sumrinu sé að ljúka en einhverra hluta vegna fer alltaf um mann ákveðin spenna um miðjan ágústmánuð. Kjánakaflinn frá lokum maí fram til byrjunar nýs tímabils heldur manni nokkurn veginn á tánum en þegar byrjað er að telja niður í fyrsta leik Ensku Úrvalsdeildarinnar er maður orðinn nokkuð sáttur við að sumrinu sé lokið.

Ég hafði hugsað mér að nýta þessa bloggsíðu til þess að fara yfir komandi leiki og svo kannski aðeins að fara yfir umferðirnar að þeim loknum, þó svo það væri ekki nema bara fyrir gamla íþróttafréttamanninn í mér.

Liverpool - Arsenal
Sem Liverpoolmanni finnst mér rétt að byrja á stórleik helgarinnar. Ég get ekki sagt að ég hafi borið miklar vonir í brjósti fyrir komandi tímabil þegar þær fréttir bárust frá Anfield-vegi að Rafa Benitez hafi verið rekinn án þess að búið væri að ganga frá ráðningu nýs knattspyrnustjóra. Vinnuumhverfið Liverpool-megin við Stanleygarð hafði ekki upp á mikið að bjóða í vor en eftir því sem á leið sumarið byrjuðu vonir mínar að glæðast. Menn tóku að tínast á æfingasvæðið frá S-Afríku og kvaðst hver í kapp við annan ætla að halda áfram hjá félaginu auk þess sem einn besti enski leikmaður síðustu ára í úrvalsdeildinni ákvað að færa sig um set frá London til Liverpool.

Takist Roy Hodgson að fá menn til þess að átta sig á því að þeir eru að spila fyrir Liverpool held ég að góðir hlutir geti gerst á þessu tímabili. Verkefnið á sunnudag er þó fjári erfitt því þar er vel spilandi og samheldið lið Arsenal boðið velkomið á Anfield. Þeir hafa fáa misst, Fabregas ákvað fyrir rest að spila með þeim en ég set spurningamerki við hausinn á honum á þessu tímabili. Ef hugurinn er farinn til Spánar gæti þetta orðið erfitt hjá Fabregas og Arsenal en ef hann nær að stýra liðinu eins og hann gerir best eiga sóknarmenn liðsins eftir að gera andstæðingum sínum lífið helvíti leitt í vetur.

Nýliðarnir Joe Cole og Marouane Chamakh skora líklega í 1-1 jafntefli

Chelsea - WBA
Meistararnir fá ekki mikla mótspyrnu í fyrstu umferðinni. Brotthvarf reynsluboltanna Ballack, Deco og Carvalho gæti haft sín áhrif á liðið auk þess sem John Terry var hvorki sannfærandi á HM eða á undirbúningstímabilinu. Terry er samt síðasti maðurinn til þess að gefast upp. Liðið á bara svo fáránlega sterka leikmenn fyrir utan þessa að stuðningsmenn þeirra þurfa ekki að hafa neinar áhyggjur í vetur og hvað þá gegn nýliðum (enn eina ferðina) WBA sem eiga ekki eftir að bilast úr sjálfstrausti eftir þessa viðureign.

Man. Utd. - Newcastle 
Fornir fjendur mætast á Old Trafford á mánudag en Newcastle er ekki svipur frá sjón frá gullaldarárum félagsins á tíunda áratug síðustu aldar. Alex Ferguson virðist hafa ótrúlegt auga fyrir því að velja nýja leikmenn í hópinn sinn (með undantekningum þó) og á hverju ári virðast 1-2 leikmenn skjóta upp kollinum úr unglingastarfi félagsins. Síðasta einn og hálfan áratuginn hafa rauðu helvítis djöflarnir verið í toppbaráttu og verður engin undantekning þar á í vetur. Liðið virkar ógnarsterkt en mögulega mun breiddin fram á við há þeim þegar líður á tímabilið. 

Newcastle hins vegar ætla sér líklegast að nýta tímabilið til þess að festa sig aftur í sessi sem Úrvalsdeildarfélag. 

Tottenham - Man. City
Spursararnir höfðu betur í baráttunni um fjórða sætið á síðasta tímabili sem hinir himinbláu Oasiselskuðu Citymenn gátu ekki litið öðruvísi á en vonbrigði. Nýfenginn gróði olli því að aragrúi leikmanna var fenginn til City á síðasta tímabili og varð engin breyting þar á í sumar enda tefla þeir líklega fram tveimur 25 manna hópum í Úrvalsdeildinni í vetur í stað eins. Skiptimarkaðsliðið Tottenham hefur hins vegar verið óþægilega rólegt á leikmannamarkaðnum í vetur en virðast í staðinn ætla að halda sig við þann hóp sem náði jú Meistaradeildarumspilssæti á síðasta tímabili og freista þess að ná stöðugleika.  Heimamenn taka þennan opnunarleik einfaldlega vegna þess að Mancini á örugglega eftir að vaka langt fram á nótt við að sigta út 18 leikmenn úr hópnum sínum til að taka þátt í þessum leik.

Aston Villa - West Ham
Minna spennandi leikir helgarinnar fara allir fram klukkan 14:00 á laugardag. Vínrauðu félögin mætast í fyrsta leik, Aston Villa missti Martin O'Neill úr brúnni rétt fyrir tímabil eftir ósætti við peningastjórnendur um hlutfall innkomu fyrir sölu miðað við útgjöld fyrir kaupum. West Ham hefur styrkt sig frá því í fyrra. Útisigur.

Blackburn - Everton
Meiðslalausir Everton eru einfaldlega klassa betri en Blackburn, X2 leikur á getraunaseðlinum

Bolton - Fulham
Nýr stjóri hjá Fulham en Owen Coyle er kominn betur inn í starfið hjá heimamönnum. 1X hér.

Sunderland - Birmingham
Öruggur heimasigur, gæti orðið erfitt tímabil hjá Birmingham en McLeish er reyndar þrælsniðugur stjóri.

Wigan - Blackpool
Einn af þeim leikjum sem Blackpool þarf að taka til þess að vera lengur en eitt tímabil í deildinni, sem er þó ekki endilega takmarkið þeirra. Wigan með ævintýralega slakt lið og mögulegir fallkandidatar.

Wolves - Stoke 
Úlfarnir falla líklega í vor. Stoke ekki skemmtilegastir, en erfitt að vinna þá. Útisigur.

Eftir leiki kvöldsins er ljóst hvaða átta lið verða í pottinum og er alveg ljóst að um slefandi spennu verður að ræða á meðal knattspyrnuáhugamanna hvernig liðin raðast.

Furðufá ensk lið eru í átta liða úrslitum þetta árið, Liverpool féll út í riðlakeppninni og Jose Mourinho er enn taplaus á Stamford Bridge en Arsenal og Manchester Utd. halda uppi heiðri enskra og hljóta þau bæði að teljast líkleg til þess að spila úrslitaleikinn.

Ríkjandi Heims-, Evrópu- og Spánarmeistarar (auk spænska bikarsins)komust áfram með öruggum sigri í kvöld ásamt franska liðinu Bordeaux en tvö frönsk lið verða í 8-liða úrslitum þetta árið. Hitt franska liðið er auðvitað Lyon sem gerði sér lítið fyrir og sló út uppáhald spænsku konungsfjölskyldunnar í tveimur stórskemmtilegum leikjum.

Bayern Munchen er að rísa upp úr öskustónni en þeir áttu í mesta basli með frískt lið Fiorentina, CSKA Moskva er með gríðarlega sterkt lið sem getur sigrað hverja sem er á heimavelli sínum og Jose Mourinho getur minnkað sjálfstraust hvaða stjóra og leikmanna sem er með sálfræðileikjum sínum, auk þess sem Inter Milan er með gríðarlega sterkan leikmannahóp.

Semsagt, tvö ensk, tvö frönsk, ítalskt, spænskt, þýskt og rússneskt lið í 8-liða úrslitum. Ég ætla að leyfa mér að henda upp óskaleikjum hér:

Arsenal - Barcelona
Inter - Bordeaux
Þessir tveir leikir mega endilega raðast á sama dag. Þvílík veisla sem ég held að tveir leikir á milli Arsenal og Barca myndu vera fyrir knattspyrnuáhugamenn og að sama skapi væri fínt ef annaðhvort Inter eða Bordeaux myndu falla úr leik fyrir undanúrslitin því bæði lið leggja gríðarlega áherslu á varnarleikinn.

Manchester Utd. - Bayern Munchen
Lyon - CSKA Moskva
Báðar þessar viðureignir myndu bjóða upp á skemmtilega knattspyrnu í samanlagt 180 mínútur og jafnvel lengur. Ellefu ár eru síðan Man. Utd. sigraði Bayern með ótrúlegum lokakafla í úrslitaleik þessa móts og í ár held ég að Bayern myndu vera rétt aðeins of litlir fyrir Utd. Í hinni viðureigninni myndu svo eigast við lið sem kæmu algjörlega pressulaus í undanúrslitin og gætu gert þar mikinn usla. Jafnvel væri gaman að fá fleiri leiki á milli Man. Utd. og CSKA Moskva en þetta eru þær viðureignir sem ég myndi vilja sjá.

Svo ég spái enn lengra þá myndu undanúrslitin koma þannig:
Barcelona - Inter
Manchester Utd. - CSKA Moskva 

	Barcelona og Bordeaux áfram
Ábyrgðarmaður færslu Tilkynna um óviðeigandi tengingu við frétt

Eftir bankahrun og í niðursveiflunni hefur orðið til fjöldi lítilla fyrirtækja sem láta frekar lítið fyrir sér fara en eru smám saman að rísa í hinum stóra alþjóðlega viðskiptaheimi. Eitt slíkt vakti athygli okkar á Tíðindi.is nýlega, lítið tölvuleikjafyrirtæki að nafni Dexoris, en tölvuleikjabransinn virðist vera ört stækkandi hér á landi og er þetta annað af tveimur fyrirtækjum sem ég veit af sem búa til leikjaviðbætur í i-línu Apple-risans. Hitt fyrirtækið er Gogogic.

Dexoris eru að gera góða hluti með nýjustu viðbót sinni sem má lesa sér enn betur til um á vefsíðu Tíðindi.is en þar er um að ræða að því er virðist bráðskemmtilega viðbót sem tengist tónlistinni sem þú ert að hlusta á í það og það skiptið. Þetta er enn eitt dæmið um það hvernig hugvitið hefur hjálpað þeim sem hafa átt erfitt með að finna vinnu í kjölfar niðursveiflunnar. Svo megið þið vera viss um það að þegar eitthvað skemmtilegt er að gerast hér á landi eða hérlend fyrirtæki gera það gott utan landsteinanna getið þið lesið ykkur til um það á Tíðindi.is.

Árið 2010 er gengið í garð í allri sinni dýrð og hef ég sett mér háleit markmið fyrir árið sem ég ætla bara að halda fyrir mig og mína í það minnsta til að byrja með.

Nóg verður að gera á árinu og er eitt af þeim verkefnum sem ég hef tekið mér fyrir hendur að gerast fréttaritari/blaðamaður á vefritinu Tíðindi.is en þar er um að ræða síðu sem einungis birtir jákvæðar fréttir. Síðan er enn í þróun og má búast við því að hún muni halda áfram að þróast næstu mánuði þar til stjórnendur hafa komið sér saman um fréttastefnuna. Ég hlakka mikið til að takast á við þetta verkefni enda ekki vanþörf á að ýta góðum og skemmtilegum fréttum að fólki á tímum sem þessum.

Mér hefur einnig hlotnast sá heiður að taka þátt í öðru fjömiðlaverkefni sem mér þykir ekki síður skemmtilegt, en ég hef fengið að lýsa þremur handboltaleikjum á vefsíðunni Sporttv.is en þar er um að ræða vefsíðu sem sýnir beint frá íþróttaviðburðum ýmis konar og hefur vakið mikla athygli. Enn hafa menn þar á bæ ekki auglýst sig út fyrir facebook en sérsamböndin hafa myndað gott samband við síðuna og hyggja á að breiða út boðskapinn. 

Fleira er auðvitað á dagskránni þetta árið en þessi verkefni eru þau nýjustu af nálinni af þeim sem ég tekst við og hjálpa mér vonandi á minni braut í fjölmiðlum. Ég hef starfað sem íþróttafréttamaður frá árinu 2004 en nú fannst mér kominn tími til þess að taka skref fram á við.

Jæja, bylting varð í íslenskum stjórnmálum og íslensku samfélagi fyrir ekki allt of mörgum mánuðum síðan. Kröfurnar um nýja stjórn voru háværar og að þjóðin skildi ekki þurfa að líða fyrir það að borga skuldir einkarekinna fjármálastofnana. Hvað ávannst með byltingunni?

Andstæðingar sjálfstæðisflokksins unnu góðan sigur í kosningunum, það er engin spurning. Samfylkingin vann engan sérstakan sigur, VG bættu verulega við sig og ný hreyfing sem kenndi sig við borgara kom inn þingmönnum. Óþarfi að fara neitt nánar yfir það en í stjórn fóru flokkar sem höfðu haft hávær ummæli um að slá þyrfti "skjaldborg um heimilin" svo ég næli í hugtak úr klisjudeildinni. Sett var á sumarþing, þar sem ástandið í þjóðfélaginu bauð ekki alveg upp á hið hefðbundna þriggja mánaða sumarleyfi Alþingis, þar sem brýnustu mál skildu kláruð.

Samfylkingin er svo helblinduð af töfralausninni ESB að þau hafa ekki einu sinni reynt að leita annarra lausna. Miðstýring hljómar alls ekkert illa í eyrum vinstri sinna nema hvað VG myndi vilja fá að stjórna því sjálf frekar en einhverjir embættismenn í Brussel en samþykktu þó með semingi til þess að fá að hanga aðeins lengur "réttum" megin á þingi. Ákveðið var semsagt að fara út í viðræður án þess þó að útlista það eitthvað sérstaklega hvað við vildum fá út úr þeim!

Þá var ESB umræðan frá í bili og tími til kominn að hjálpa heimilum í landinu eitthvað sem eru að sligast undan skuldum og allt of hárri vísitölu. Njeh, niðurskurður og skattahækkanir voru kjörorðið. Allra helst skattahækkanir sem skila sér út í verðlagið, hækka þannig vísitöluna og auka skuldir heimilanna! Áfengisgjald var hækkað og sykurskatturinn ógurlegi mun líta dagsins ljós á morgun, úr 7% í 24,5%! Ég man ekki til þess að hafa kosið Íþróttaálfinn sem alráð. Þrátt fyrir að vera ekki nauðsynjavörur hafa þær nokkur áhrif á vísitöluna sem skilar sér einfaldlega í hærri afborgunum af lánum. 

Þrátt fyrir gjaldeyrishöft hefur gengi íslensku krónunnar hrunið sem þýðir að allar innfluttar vörur verða mun dýrari, bensín á bílinn er orðið munaðarvara og eru flestar innfluttar vörur að verða exotískar sökum verðs. Að sjálfsögðu skilar þetta sér út í vísitöluna sem hækkar þá afborganir enn frekar.

IceSave var svo drifið í gegnum sumarþingið. Einhvern veginn hefði maður haldið að það hefði getað verið sniðugt að senda þaulvanan harðan samningamann í viðræður við Breta og Hollendinga en niðurstaðan varð stuttur fundur þar sem ákveðið var að við skildum bara redda þessu. Frábært. Svo þykjast menn hafa breytt því eitthvað með einhverjum fyrirvörum sem voru samþykktir á þinginu hér en maður hefði nú haldið að hinir samningaaðilarnir vildu kannski sjá það áður en þeir verða jafn samþykkir.

Jæja, það mál var afgreitt og nú skal komið að því að bjarga heimilunum svo fólk geti farið að hugsa um eitthvað annað en hvernig í fjandanum það eigi nú að fara að því að lifa af á þessu skeri þegar skammdegið fer að skella á. Neibb, Jóhanna og Steingrímur farin á vespunum sínum og veifa okkur "ciao" (stolið af Eddie Izzard, ég veit). Niðurstaðan er semsagt þessi eftir byltinguna: Hærri skattar, krónan er fokkd, við borgum skuldir einkafyrirtækja ... en hey, það er allt í lagi. ESB er töfralausnin!