Heimabær Ricky Tomlinson

Fyrir þá sem ekki eru með nafn leikarans í fyrirsögninni á hreinu þá er hann maðurinn sem lék titilhlutverkið í hinni frábæru knattspyrnukvikmynd Mike Bassett, England Manager. Stórskemmtileg paródía á umstangið í kringum enska landsliðið í knattspyrnu og kennir eftirmönnum hans að skrifa ekki landsliðshópinn sinn á sígarettupakka.

Allavega ... Ástæðan fyrir því að ég nefni nafn hans hér er að hann á það sameiginlegt með söngvaranum Robert Smith úr Cure að koma frá lítilli hafnarborg í Vestur-Englandi sem kallast Blackpool. Frá því um miðja síðustu öld hefur borgin gert út á ferðamannaiðnað og ætti nú heldur betur að glæðast hjá þessu litla samfélagi sem telur litlu færri en búa samanlagt á höfuðborgarsvæðinu hér á landi því hið appelsínugulklædda lið þeirra hefur unnið sér sæti í Úrvalsdeildinni þar í landi og komu þeir allra liða mest á óvart í fyrstu umferðinni með öruggum 4-0 sigri gegn Wigan á útivelli.

Engu máli skiptir hvað gerist í leik Man. Utd. og Newcastle á morgun, þessi árangur smáliðsins Blackpool gegn liði sem halaði inn ótrúlegustu stig á heimavelli síðasta vetur er hreint frábær og gerir lífið alls ekki auðveldara fyrir knattspyrnustjóra Wigan í upphafi tímabils.

Af öðrum leikjum á Englandi þá er ljóst að Chelsea ætlar sér ekki að láta titilinn af hendi og liðin sem koma til með að keppa um sæti 3-4 tóku sitt stigið hvert í innbyrðis viðureignum sínum. Þó Liverpool hafi verið óheppið að leyfa Arsenal að slefa inn þessu marki í restina verða 1-1 að teljast frábær úrslit einum færri gegn Arsenal.

Þeir eru KR 
Langaði svo aðeins að minnast á bikarúrslitaleikinn á milli KR og FH. FH voru virkilega baráttuglaðir í leiknum en um leið og KR fannst dómarinn dæma óréttlátt víti, sem það var svo sannarlega ekki eftir að hafa séð það í sjónvarpi, þá virtust þeir ákveða að hann væri sökudólgurinn og virtust láta þar við sitja. Eins og Óli Þórðar myndi orða það þá virtist hausinn ekki verða rétt skrúfaður á þá appelsínugulu í gær því þessir tveir vítaspyrnudómar fóru augljóslega allt of mikið í taugarnar á þeim til þess að þeir gætu einbeitt sér að því að jafna leikinn.

FH vissulega vel að sigrinum komnir sem betra liðið í leiknum, en lið sem hefur efni á því að hafa leikmenn eins og Viktor Bjarka Arnarson og Jordao Diogo á varamannabekknum myndi maður ætla að gæfi frá sér meiri mótspyrnu en þetta þegar mönnum finnst allt vera á móti sér.

Þar til síðar 

Haustboðinn ljúfi (fótboltablogg)

Ekki það að ég sé eitthvað ánægður með að sumrinu sé að ljúka en einhverra hluta vegna fer alltaf um mann ákveðin spenna um miðjan ágústmánuð. Kjánakaflinn frá lokum maí fram til byrjunar nýs tímabils heldur manni nokkurn veginn á tánum en þegar byrjað er að telja niður í fyrsta leik Ensku Úrvalsdeildarinnar er maður orðinn nokkuð sáttur við að sumrinu sé lokið.

Ég hafði hugsað mér að nýta þessa bloggsíðu til þess að fara yfir komandi leiki og svo kannski aðeins að fara yfir umferðirnar að þeim loknum, þó svo það væri ekki nema bara fyrir gamla íþróttafréttamanninn í mér.

Liverpool - Arsenal
Sem Liverpoolmanni finnst mér rétt að byrja á stórleik helgarinnar. Ég get ekki sagt að ég hafi borið miklar vonir í brjósti fyrir komandi tímabil þegar þær fréttir bárust frá Anfield-vegi að Rafa Benitez hafi verið rekinn án þess að búið væri að ganga frá ráðningu nýs knattspyrnustjóra. Vinnuumhverfið Liverpool-megin við Stanleygarð hafði ekki upp á mikið að bjóða í vor en eftir því sem á leið sumarið byrjuðu vonir mínar að glæðast. Menn tóku að tínast á æfingasvæðið frá S-Afríku og kvaðst hver í kapp við annan ætla að halda áfram hjá félaginu auk þess sem einn besti enski leikmaður síðustu ára í úrvalsdeildinni ákvað að færa sig um set frá London til Liverpool.

Takist Roy Hodgson að fá menn til þess að átta sig á því að þeir eru að spila fyrir Liverpool held ég að góðir hlutir geti gerst á þessu tímabili. Verkefnið á sunnudag er þó fjári erfitt því þar er vel spilandi og samheldið lið Arsenal boðið velkomið á Anfield. Þeir hafa fáa misst, Fabregas ákvað fyrir rest að spila með þeim en ég set spurningamerki við hausinn á honum á þessu tímabili. Ef hugurinn er farinn til Spánar gæti þetta orðið erfitt hjá Fabregas og Arsenal en ef hann nær að stýra liðinu eins og hann gerir best eiga sóknarmenn liðsins eftir að gera andstæðingum sínum lífið helvíti leitt í vetur.

Nýliðarnir Joe Cole og Marouane Chamakh skora líklega í 1-1 jafntefli

Chelsea - WBA
Meistararnir fá ekki mikla mótspyrnu í fyrstu umferðinni. Brotthvarf reynsluboltanna Ballack, Deco og Carvalho gæti haft sín áhrif á liðið auk þess sem John Terry var hvorki sannfærandi á HM eða á undirbúningstímabilinu. Terry er samt síðasti maðurinn til þess að gefast upp. Liðið á bara svo fáránlega sterka leikmenn fyrir utan þessa að stuðningsmenn þeirra þurfa ekki að hafa neinar áhyggjur í vetur og hvað þá gegn nýliðum (enn eina ferðina) WBA sem eiga ekki eftir að bilast úr sjálfstrausti eftir þessa viðureign.

Man. Utd. - Newcastle 
Fornir fjendur mætast á Old Trafford á mánudag en Newcastle er ekki svipur frá sjón frá gullaldarárum félagsins á tíunda áratug síðustu aldar. Alex Ferguson virðist hafa ótrúlegt auga fyrir því að velja nýja leikmenn í hópinn sinn (með undantekningum þó) og á hverju ári virðast 1-2 leikmenn skjóta upp kollinum úr unglingastarfi félagsins. Síðasta einn og hálfan áratuginn hafa rauðu helvítis djöflarnir verið í toppbaráttu og verður engin undantekning þar á í vetur. Liðið virkar ógnarsterkt en mögulega mun breiddin fram á við há þeim þegar líður á tímabilið. 

Newcastle hins vegar ætla sér líklegast að nýta tímabilið til þess að festa sig aftur í sessi sem Úrvalsdeildarfélag. 

Tottenham - Man. City
Spursararnir höfðu betur í baráttunni um fjórða sætið á síðasta tímabili sem hinir himinbláu Oasiselskuðu Citymenn gátu ekki litið öðruvísi á en vonbrigði. Nýfenginn gróði olli því að aragrúi leikmanna var fenginn til City á síðasta tímabili og varð engin breyting þar á í sumar enda tefla þeir líklega fram tveimur 25 manna hópum í Úrvalsdeildinni í vetur í stað eins. Skiptimarkaðsliðið Tottenham hefur hins vegar verið óþægilega rólegt á leikmannamarkaðnum í vetur en virðast í staðinn ætla að halda sig við þann hóp sem náði jú Meistaradeildarumspilssæti á síðasta tímabili og freista þess að ná stöðugleika.  Heimamenn taka þennan opnunarleik einfaldlega vegna þess að Mancini á örugglega eftir að vaka langt fram á nótt við að sigta út 18 leikmenn úr hópnum sínum til að taka þátt í þessum leik.

Aston Villa - West Ham
Minna spennandi leikir helgarinnar fara allir fram klukkan 14:00 á laugardag. Vínrauðu félögin mætast í fyrsta leik, Aston Villa missti Martin O'Neill úr brúnni rétt fyrir tímabil eftir ósætti við peningastjórnendur um hlutfall innkomu fyrir sölu miðað við útgjöld fyrir kaupum. West Ham hefur styrkt sig frá því í fyrra. Útisigur.

Blackburn - Everton
Meiðslalausir Everton eru einfaldlega klassa betri en Blackburn, X2 leikur á getraunaseðlinum

Bolton - Fulham
Nýr stjóri hjá Fulham en Owen Coyle er kominn betur inn í starfið hjá heimamönnum. 1X hér.

Sunderland - Birmingham
Öruggur heimasigur, gæti orðið erfitt tímabil hjá Birmingham en McLeish er reyndar þrælsniðugur stjóri.

Wigan - Blackpool
Einn af þeim leikjum sem Blackpool þarf að taka til þess að vera lengur en eitt tímabil í deildinni, sem er þó ekki endilega takmarkið þeirra. Wigan með ævintýralega slakt lið og mögulegir fallkandidatar.

Wolves - Stoke 
Úlfarnir falla líklega í vor. Stoke ekki skemmtilegastir, en erfitt að vinna þá. Útisigur.